هذه اول مشكلته وصلت الي مشاكل الحب والحل وصل لصاحبة المشكله

بسم الله الرحمن الرحيم
احب ابدأ كلامى واقول ان الموقع ده اكتر من رائع ويوميا بفتحه ومش بفتح غيره

وابدأ بقى واوجع دماغ اللى حيدخل يلحقنى او يحاول يساعدنى ويحل مشكلتى واتمنى ان يكون ليا حل فى المنتدى اللى انا نفسي اسميه المنتدى الام نظرا لاهميته وجماله

خطيبي

هو المشكله ولا يوجد غيره مشكله فى حياتى وفى حياه اسرتى تقريبا

القصه من البدايه

من 5 سنين كده بالظبط وانا داخله اولى كليه عرفته فى رحله كان اخو واحد معايا فى الدرس وانا كنت عمرى مابكلم حد اعجبت بيه قوى وبعدين حبيته قوى كان اول واحد احبه واول واحد اكلمه واول واحد فى كل حاجه مكنتش اعرف عن الحب غير ان كفايه انه بحبك وبس وكان من الواضح ان ده مقصرش فيه نسيت اقول انه كان حب من طرف واحد بس
مكنتش اعرف كلام التليفون وكنت اتريق على اللى بيتكلموا بالساعات واقول ازاى لغايه معرفت واتريق على الجوابات اللى بتبقى 10 صفحات لغاياه ماكتبت
ولغايه ولغايه ولغايه والخ من كل حاجه لازم تتعمل مدام بحب
حاولت اشده نحيتى بس من غير مااعرفه باى حاجه من ناحيتى لغايه ماجت واحده من اصحابى وقالتله على كل حاجه منها لله
المهم جه وقاله انه عايز يرتبط بيا وكأنه بيجبر بخاطري
وانا صدقت لكن ماكنش لسه حبنى
عمري ماحسيت فى حبه ليا فى البدايه
بدأت افتح فى الهزار مع اصحابه واكلمهم وكنا شله كلنا وعمره ماكان بيقول حاجه
بنات وولاد
سابنى وعرف واحده عندى فى الكليه وصدقونى لو قلتلكم انها كانت اخلاقها مش كويسه يعنى ياريته سابنى عشان حاجه تستاهل لكن للاسف
بس حاولت ابعد عنه ومكنتش بقدر قررنا نكون اصحاب طبعا
كنت بصالحهم على بعض وعمري فى حياتى ماحاولت استغل خناقه بينهم
ونسيت اقولكم انها هيا كمان كانت عارفه انى مرتبطه بيه وبحبه قبل ماترتبط بيه ومافرقش معاها ووجعت قلبى بالرغم من انى راعيت ربنا فيها وكنت انا الوحيده اللى بتدخل بينهم
المهم
عرف اخيرا قيمتى وحبنى حب فوق العاده وصدقونى انا عارفه انا بقول ايه
انا كنت فى الوقت ده كل حاجه ليه وروحه وعقله
وانا كنت طيبه وغلبانه اكتر
حصل بينا مشاكل كتير بسبب اصحابه وانه عايزنى اكلم اللى على مزاجه وانا كنت لسه ماتطبعتش بطبعه ويمكن ده غلطى
لغايه ماعرفت بالصدفه انه رجع يكلمها تانى
تخيلوا كده انى بكون فى الكليه وشايفاها بتتزوق وبتحط ميكب عشان رايحه تقابله وانا بتقطع وهو ماحسش بيا
يومها كنت مروحه وانا فى المواصلات قعد جانبي ولد قدى فى السن كنت بعيط ومش قادره اتحمل اللى بيحصل من ورايه وهو عارف انى عارفه ومش حاسس بيا
اتكلم معايا واتفقنا نكون اصحاب فقط والحقيقه كان نعم الصاحب مابيتأخرش عليا فى اى حاجه
وعشان دماغكم ماتروحش بعيد عمرنا مافكرنا فى بعض كأرتباط كنا اصحاب فعلا

المهم نرجع لموضوعنا عرف الاستاذ انه الاخ الجديد ده بيكلمنى ومقبلهاش على كرامته وهزأنى وانا بحبه وبعشق التراب اللى بيمشي عليه سامحته على اللى عمله فيا
لكن هو مقدرش يغفرلى انى كنت فى ازمه ومكنش جانبي حد حتى صاحبتى الوحيده علاقتى بيها اتقطعت من وقتها لغايه دلوقتى
وبقى بيشك فيا وهى دي المشكله
رغم كل الغلطات اللى عملها لكن بيحبنى فعلا ومش قادر يستغنى عنى سيبنا بعض كتير وبنرجع لبعض اكتر
هو بيشك فيا قوى اى حد بكلمه يبقي بيحبنى او فى حاجه بينى وبينه
انا عارفه انى طولت قوى ونفسي فى حديقرا موضوعى لغايه الاخر وينصحنى
حبيبي ياجماعه بيشك فيا مهما عملت
انا عارفه انى غلطت فى حاجات كتير لانه كان بيمنعنى من حاجات لازم اعملها وكنت بضطر اعملها وارجع اقوله عليها بعدين يعنى بكدب واقعد احلف وارجع اقول الحقيقه بعد كده
انا مش عارفه اعمل ايه احنا اتخطبنا من حوالى شهر بعد قصه حب 5 سنين كل الناس حسدتنا عليها ومفكرين ان احنا اسعد 2 فى الدنيا واحنا بالعكس اكتر2 ضربوا الارقام القياسيه فى الخناق
شكاك لدرجه فوق الوصف
- ممنوع اكلم زمايلى الولاد فى الكليه
- ممنوع اكلم قرايبي
- اصحابي البنات اللى بيكلموا ولاد كارت احمر علطول مع العلم ان احنا كنا زيهم
- جيرانى ممنوع ممنوع
- الشغل ممنوع عشان ماعملش علاقات فى شغلى
- ده غير كل مشلكه بيعملهالى لو اتهيأله انى بعمل حاجه
وصدقونى الممنوعات دى بجد وفوق المعتاد واوفر قوى
وممكن نفك خطوبتنا لو حصل عكس الكلام وهكذا
صدقونى انا مش بعمل حاجه بجد ولا بخونه ولا خنته
انا كل غلطه كنت بغلطها كنت ارجع واقوله عليها
لكن هو متخيل انى بعمل اكتر من اللى بقوله
انصحونى اعمل معاه ايه انا عارفه انه بيحبنى ومش قادر يستغنى عنى
انا لو رايحه فى حته بيفضل تقريبا معايا على التليفون لغايه ماارجع
هو طيب قوى وعارفه انى انا اللى وصلته لكده
قولولى اعمل ايه عشان ارجعه تانى يصدقنى مع العلم انه دلوقتى مش بعمله اى حاجه وبسمع كلامه حتى لو مش راضيه
ارجو من اى حد انه يساعدنى
ومعلش انى طولت عليكم